O percorrido, duns 11 kilómetros, levou aos asistentes por antigas papeleiras localizadas nesta zona
Arredor de 50 persoas participaron o pasado sábado na ruta de sendeirismo polo río Vilacoba. Esta iniciativa, organizada polo Concello de Lousame, inclúese dentro do programa de actividades de lecer estival.
O percorrido deu comezo arredor das 09.30 horas despois do traslado dos participantes en bus dende a praza Teodomiro Hidalgo ata a aldea de Comparada. Alí, iniciouse un percorrido duns 11 kilómetros entre a ponte a minicentral de Pías e a casa do Concello. A través desta ruta, os veciños asistentes puideron ver ata tres antigas papeleiras, e máis concretamente, as de A Galiñeira, Fontán e Brandía.
Entre os puntos polos que pasaron durante o percorrido atópanse as aldeas de Vilacoba e Lesende. Tras o descenso ata o lugar de Soutorredondo continuouse a ruta de sendeirismo seguindo o curso do río Vilacoba ata o punto final, a praza do Concello. A actividade finalizou arredor das 13.00 horas.
Dende o Concello de Lousame amósanse moi satisfeitos pola boa resposta a esta iniciativa. A pesares das chuvias a primeira hora do sábado, foron arredor de medio cento de persoas as que quixeron gozar dunha xornada de sábado en medio do patrimonio natural e histórico do municipio.
