5 de setembro de 2018.- O campo da festa de San Roquiño, na parroquia de Tállara (Lousame), acollerá este domingo 9 de setembro, ás 21.00 horas, a tradicional homenaxe a Prudencio Romo que organizan o Concello de Lousame e a Banda de Música de Lousame. Un evento que, en caso de choiva, trasladaríase ao polideportivo municipal da Silva.
O concerto homenaxe contará coa actuación de tres bandas: a Banda de Música de Lousame, dirixida por Fernando Froján Canle; a Banda de Música Municipal de Boiro, dirixida por Martín Baleirón Frieiro; e a Banda de Música de Catoira, dirixida por Carlos Figueira Abuín. “Nesta ocasión contaremos coa participación de tres bandas coas que tocaremos ao mesmo tempo bandas sonoras de películas coñecidas por todos”, explica Fernando Froján.
O programa estará composto polas seguintes bandas sonoras: Indiana Jones (John Williams), James Bond (arranxo de Johan de Meij), King Kong (James Newton Howard), O señor dos aneis (Howard Shore) e momentos de Morricone. No campo da festa de San Roquiño haberá instalada tamén unha gran pantalla, sobre a que se proxectarán imaxes destas películas. A asistencia é totalmente libre e de balde.
